ہریش کمپنی کیس میں زرداری کو گرفتاری کا خدشہ

تسنیم خبررساں ادارے کے مطابق، نیب کی جانب سے آصف علی زرداری کو کل طلب کیے جانے کے بعد انہوں نے گرفتاری کے خدشے کے پیش نظر آج اسلام آباد ہائیکورٹ میں ضمانت قبل از گرفتاری کی درخواست دائر کی ۔

آصف زرداری کی جانب سے دائر درخواست میں مؤقف اختیار کیا گیا کہ نیب نے کل ہریش کمپنی کیس میں طلب کیا ہے اور انہیں گرفتاری کا خدشہ ہے، لہذا عدالت سے استدعا کی کہ نیب کو گرفتاری سے روکا جائے اور ضمانت منظور کی جائے۔

دوسری دائر درخواست میں انہوں نے موقف اختیارکیا کہ جوائنٹ وینچر پرائیوٹ معاہدہ ہے، نیب کا اختیار نہیں بنتا، کیس پر حتمی فیصلے تک ضمانت منظور کی جائے۔

واضح رہے کہ آصف علی زرداری کی جانب سے اسلام آباد ہائیکورٹ میں ضمانت کی درخواستوں کی مجموعی تعداد 7 ہوگئی ہے۔