آصف زرداری ذاتی معالج سے علاج نہیں کرواسکتے، میڈیکل بورڈ تشکیل
اسلام آباد: سابق صدر آصف علی زرداری کے میڈیکل بورڈ کی تشکیل نو ہو گئی ہے، ذرایع کا کہنا ہے کہ میڈیکل بورڈ میں نیورو سرجن، نیورولوجسٹ، امراض قلب، میڈیسن اور شعبہ انتظامیہ کے ڈاکٹرز شامل ہیں۔
تسنیم خبررساں ادارے کی رپورٹ کے مطابق، آصف زرداری کے علاج کے لیے میڈیکل بورڈ بنا دیا گیا ہے، ڈاکٹر شجیح صدیقی بورڈ کے سربراہ برقرار رہیں گے، بورڈ میں ڈاکٹر مظہر بادشاہ، ڈاکٹر نذیر بھٹی، ڈاکٹر نعیم ملک، ڈاکٹر ذوالفقار غوری شامل ہیں۔
پمز اسپتال کے ذرایع کا کہنا ہے کہ آصف زرداری کے ذاتی معالج کو میڈیکل بورڈ میں شامل نہیں کیا گیا ہے، تاہم میڈیکل بورڈ حسب ضرورت رپورٹس پر آصف زرداری کے ذاتی معالج سے مشاورت کرے گا۔
یاد رہے کہ اسلام آباد ہائی کورٹ نے سابق صدر آصف زرداری کی ضمانت بعد از گرفتاری کی درخواستوں پرسماعت کے دوران پمز اسپتال کو خصوصی میڈیکل بورڈ تشکیل دینے کا حکم دیا تھا، سابق صدر کے ذاتی معالج کو بھی بورڈ میں شامل کرنے کی ہدایت کی گئی تھی۔
ہائی کورٹ نے بدھ کو حکم دیا تھا کہ میڈیکل بورڈ آصف زرداری کی رپورٹ آیندہ سماعت سے پہلے عدالت میں پیش کرے۔ بعد ازاں اسلام آباد ہائی کورٹ نے سماعت 11 دسمبر تک ملتوی کر دی۔
