شہباز شریف لندن سےواپس، لاہور پہنچ گئے
پاکستان مسلم لیگ ن کے صدر میاں شہباز شریف آج لندن سے اسلام آباد ایئر پورٹ پہنچے، جہاں سے وہ لاہور چلے گئے۔
تسنیم خبررساں ادارے کے مطابق، اپوزیشن لیڈر شہباز شریف وطن واپس پہنچ گئے ہیں، اسلام آباد ایئرپورٹ پر مریم اورنگ زیب اور شاہد خاقان عباسی نے ان کا استقبال کیا۔ شہباز شریف نے ایئر پورٹ پر اسکریننگ کروائی اور ہیلتھ ڈیکلیئریشن فارم بھی جمع کروایا۔
شہباز شریف کا درجہ حرارت نارمل ہونے پر محکمہ صحت نے انھیں جانے کی اجازت دی، جس پر وہ اسلام آباد ایئر پورٹ سے لاہور کے لیے روانہ ہوئے۔
انھوں نے پاکستان پہنچنے پر ٹویٹ کرتے ہوئے لکھا کہ وہ اسلام آباد پہنچ گئے ہیں، ایک دوسرے سے فاصلہ رکھیں، کوشش کریں کہ گھر ہی پر رہیں، احتیاط کریں تاکہ کوئی اس بیماری سے اپنے پیاروں سے جدا نہ ہو۔
دریں اثنا، شہباز شریف اسلام آباد سے لاہور اپنی رہایش گاہ ماڈل ٹاؤن پہنچ گئے، وہ براستہ موٹر وے لاہور پہنچے۔
ادھر فواد چوہدری نے ٹویٹ کر کے لکھا کہ شہباز شریف کی فلائٹ کو پاکستان آنے دینا خوش آیند ہے، وہ اپوزیشن لیڈر ہیں، واپسی کے لیے بڑی محنت ہوئی، وہ آ گئے ورنہ پارٹی پر ان کے دوستوں کا قبضہ ہو ہی گیا تھا، امید ہے باقی شریف فیملی بھی اسی طرح واپس آئے گی۔
