پاک-افغان بارڈر باڑ، امن کی باڑ ہے، جنرل باجوہ


پاک-افغان بارڈر باڑ، امن کی باڑ ہے، جنرل باجوہ

پاکستانی فوج کے سربراہ کا کہنا ہے کہ پاک-افغان بارڈر باڑ امن کی باڑ ہے۔ یہ صرف دہشت گردوں کی بارڈر کے دونوں اطراف غیر قانونی نقل وحرکت کو روکنے کیلئے بنائی گئی ہے۔

تسنیم خبررساں ادارے کےمطابق،پاک فوج کے سربراہ نے کہا ہے کہ  پاکستان ہمیشہ افغانستان میں امن کا خواہاں ہے اور اس کیلئے بھرپور تعاون کرتا رہے گا۔ پاکستان میں موجود افغان مہاجرین بھائیوں کو بھی اس سلسلے میں ایسی دْشمن قوتوں سے چوکنا اور دور رہنا ہو گا تاکہ وہ دانستگی اور نادانستگی میں دہشت گرد کارروائیوں میں استعمال نہ ہو سکیں۔

انہوں نے کہا کہ پاکستان نے افغان بھائیوں کیلئے اپنے دِل اور دروازے کھول دیے، ہم ہمیشہ افغان بھائیوں کے دْکھ اور سکھ میں شریک ہیں۔ افغانستان اور پاکستان کا امن ایک دوسرے سے جْڑا ہے۔

انہوں نے مزید کہا کہ دہشت گردی کا کوئی مذہب نہیں ہوتا۔ اْن کا نظریہ دہشت پھیلانا اور معاشرے میں خوف کی فضاپیدا کرنا ہے۔ مدرسے پر حملہ دراصل اسلام دْشمنی ہے۔ مدرسہ، منبر، مساجد، امام بارگاہیں، گرجا، مندر، تعلیمی ادارے اور قانون نافذ کرنے والے اداروں کے ساتھ معصوم شہری ان کا نشانہ ہیں۔

پاکستان اور افغانستان دونوں موجودہ حالات میں کسی بد امنی اور انتشار کے متحمل نہیں ہو سکتے؛ کیونکہ اس کے نتائج خطرناک ہوں گے۔ ہمارے دل پہلے بھی ساتھ دھڑکتے تھے اور اب بھی ہم آپس میں جْڑ ے ہوئے ہیں۔

جنرل قمر جاوید باجوہ نے کہا ہے کہ دہشت گردوں اور ان کے سہولت کاروں کو کیفر کردار تک پہنچانے سے پہلے چین سے نہیں بیٹھیں گے۔

قوم نے دہشت گردوں کا بیانیہ مسترد کر دیا ہے۔ ہمہ جہتی اور اتحاد ہی وقت کی ضرورت ہے۔ہم آنے والی نسلوں کو ایک محفوظ، مستحکم اور خوشحال پاکستان دینے کیلئے کوشاں ہیں۔

آئی ایس پی آر کے مطابق جنرل قمرجاوید باجوہ نے اَپر دیر  مالاکنڈ ڈویژن  کا دورہ۔کور کمانڈر پشاور کور لیفٹیننٹ جنرل نعمان محمود نے آرمی چیف کی آمد پر استقبال کیا۔

آرمی چیف کو آپریشنز کے تسلسل و استحکام  اور  بارڈر مینجمنٹ پر بریفنگ دی گئی۔آرمی چیف نے سنگلاخ اور دشوار گزار علاقے میں بارڈر فینسنگ پر ٹروپس کی کارکردگی کو سراہا۔

سرحدوں کی حفاظت اور بارڈر مینجمنٹ سسٹم  پاکستان کے امن کے عزم کی حقیقی عکاس ہیں۔ آرمی چیف نے جوانوں کو علاقے میں امن کے قیام کیلئے کی گئی کوششوں پر زبردست خراجِ تحسین پیش کیا۔

 انہوں نے شر پسند عناصر کی جانب سے حالیہ دہشت گردی کے واقعات کے تناظر میں جوانوں کو چوکنا رہنے کی ہدایت کی۔ چیف آف آرمی سٹاف نے لیڈی ریڈنگ ہسپتال پشاور میں مدرسہ دھماکے میں زخمی ہونے والے بچوں اور دیگر افراد کی عیادت بھی کی اور اْن کی صحت کے بارے میں دریافت کیا۔

 اس موقع پر چیف آف آرمی سٹاف نے کہا کہ 16 دسمبر 2014ء  کو اے پی ایس پشاور میں معصوم بچوں کو ٹارگٹ کیا گیا۔27 اکتوبر یوم سیاہ کشمیر کے موقع پر دشمن نے ایک بار پھر اپنی سیاہ تاریخ اور مذموم عزائم کو دوبارہ پروان چڑھانے کے لئے مدرسہ کے معصوم بچوں کو خون میں نہلا دیا۔

 ان بچوں میں افغان مہاجرین کے بچوں کی بڑی تعداد بھی شامل تھی۔ کل بھی  پوری قوم نے دہشت گردوں کے بیانیے کو مسترد کرتے ہوئے بے مثال یکجہتی کا مظاہرہ کیا تھا  اور آج بھی ہم اْس جذبے کے تحت ایک ہیں۔ ہمارا دکھ کل بھی مشترک تھا اورآج بھی۔ دشمن کل بھی وہی تھا۔ دشمن آج بھی وہی ہے۔ کل بھی قوم نے دْشمن کو مسترد کیا اور دہشت گرد نظریے کو شکست دی۔ آج بھی ہم متحد ہیں اور مل کر اس کا مقابلہ کریں گے۔

میں یکجہتی اور عزم کا اظہار کرنے کے لئے خاص طور پر مدرسے کے ان بچوں، اساتذہ اور خاندانوں کا دْکھ بانٹنے آیا ہوں۔ اْس وقت تک چین سے نہیں بیٹھیں گے جب تک ہم دہشت گردوں اور ان کے سہولت کاروں کو کیفرکردار تک نہ پہنچائیں۔ افغانستان اور پاکستا ن دونوں نے پچھلی دو دہائیوں میں دہشت گردی کا سامنا کیا ہے۔

 

 

اہم ترین پاکستان خبریں
اہم ترین خبریں
خبرنگار افتخاری