حمایت تاجیکستان از مواضع کابل در مذاکرات بین‌الافغانی
رئیس‌جمهور تاجیکستان با اعلام حمایت از روند صلح به‌رهبری و مالکیت افغان‌ها گفت که از موضع رئیس‌جمهور افغانستان در نشست‌های منطقه‌ای و بین‌المللی پشتیبانی خواهد کرد.
به گزارش دفتر منطقه‌ای خبرگزاری تسنیم، «امامعلی رحمان» رئیس جمهور تاجیکستان و «اشرف غنی» رئیس جمهور افغانستان در یک تماس تلفنی درباره روابط دوجانبه به‌ویژه مسایل تجاری، ترانزیت، تقویت هرچه بیشتر همکاری‌های منطقه‌ای و افزایش همکاری‌ها در امتداد سواحل آمودریا صحبت کردند.
ارگ ریاست جمهوری افغانستان در بیانیه‌ای اعلام کرد که در این تماس امامعلی رحمان از روند صلح به‌رهبری و مالکیت دولت افغانستان حمایت کرد و ضمن پشتیبانی از موضع اشرف غنی وعده داد که تاجیکستان در نشست‌های منطقه‌ای و بین‌المللی کنار کابل خواهد بود و از موضع آن حمایت می‌کند.
رئیس جمهور تاجیکستان همچنین از اشرف غنی خواست برای روابط و توسعه همکاری‌ها به دوشنبه سفر کند که با پذیرش رئیس جمهور افغانستان روبه‌رو شد.
هر دو طرف توافق کردند که تحت ریاست محمد حنیف اتمر سرپرست وزارت امور خارجه افغانستان، هیئتی در روزهای نزدیک به تاجیکستان سفر کند و درباره دستور کار نشست رؤسای جمهور تاجیکستان و افغانستان به‌خاطر همکاری‌های بیشتر، کار کند.
در این تماس همچنین توافق شد که در سفر سرپرست وزارت خارجه افغانستان به تاجیکستان در روزهای آینده دو طرف درباره مسایل سیاسی، همکاری‌های اقتصادی و امنیتی به‌ویژه مبارزه علیه تروریسم و مواد مخدر، نیز بحث و تبادل نظر کنند.
تاجیکستان پیش از این نیز بارها نسبت به گسترش ناامنی از افغانستان به خاک این کشور ابراز نگرانی کرده بود که در پی آن روسیه برای حفاظت از مرزهای مشترک دو کشور تانک‌های پیشرفته و چند فروند بالگرد را به مقامات دوشنبه تحویل داد.
انتهای پیام/.+
