گفتگوی چین و تاجیکستان درباره آینده افغانستان
نماینده چین برای افغانستان اظهار داشت با رئیس بخش مطالعات استراتژیک وزارت خارجه تاجیکستان، گفتگوی سازنده‌ای درباره مسائل منطقه به ویژه افغانستان داشته است.
به گزارش دفتر منطقه‌ای خبرگزاری تسنیم، «یو‌شیائو یونگ» نماینده ویژه چین برای افغانستان در پستی در شبکه ایکس از گفتگوی مثبت و سازنده با «شرف رحیمی» دیپلمات تاجیکستانی، خبر داد.
این دیدار به منظور بررسی راه‌های همکاری برای کمک به بازسازی افغانستان برگزار شده است. یونگ در این پست نوشت: «ما امروز یک گفتگوی بسیار خوب به خاطر همکاری با یکدیگر برای کمک به بازسازی افغانستان داشتیم.»
چین و تاجیکستان، مانند بسیاری از کشورهای دیگر، تاکنون طالبان را به رسمیت نشناخته‌اند. با این حال، چین روابط دیپلماتیک و اقتصادی گسترده‌ای با طالبان برقرار کرده است.
از سوی دیگر نیز تاجیکستان که میزبان شماری از اعضای جبهه مقاومت پنجشیر است، پیش‌تر از ایجاد روابط دیپلماتیک با طالبان خودداری کرده و بارها انتقادات خود را نسبت به سیاست‌های این گروه ابراز کرده است.
«امامعلی رحمان» رئیس‌جمهور تاجیکستان، در سال‌های اخیر از طالبان به دلیل عدم تحقق وعده‌های آنها در زمینه تشکیل حکومت فراگیر انتقاد کرده و بر این نکته تأکید کرده است که سیاست‌های آنهاه به تبعیض علیه اقوام مختلف افغانستان منجر شده است.
به نظر می‌رسد گفتگوی اخیر نماینده چین و دیپلمات تاجیکستانی نشان‌دهنده تلاش‌های مشترک دو کشور و یک گام مثبت در راستای همکاری‌های منطقه‌ای و بین‌المللی در جهت ثبات و امنیت افغانستان تلقی شود.
انتهای پیام/.