کوئٹہ تفتان ریلوے لائن کو بہت جلد بہتر بنائیں گے: شیخ رشید

تسنیم خبررساں ادارے کی رپورٹ کے مطابق، وفاقی وزیر ریلوے شیخ رشید کا کہنا ہے ریلوے میں ریسرچ اینڈ پلاننگ سینٹر بنایا گیا ہے۔ چین، ایران اور کوریا کے تعاون سے بڑا ریلوے نیٹ ورک قائم کریں گے۔

شیخ رشید کا کہنا ہے کہ رواں سال ریلوے خسارہ نمایاں طور پر کم ہوگا، 20 ٹرینیں 6 ماہ میں چلائیں اور 20 مزید چلیں گی۔

شیخ رشید نے کہا کہ چین کے 5 ریلوے انجن کی اپ گریڈیشن اور مرمت جاری ہے، رواں سال ریلوے خسارہ نمایاں طور پر کم ہوگا۔ ’70 سال سے ہم مکھیاں مار رہے ہیں‘۔

انہوں نے کہا کہ کمزور طبقے کے لیے بھی ایک نئی ٹرین شروع کر رہے ہیں، نئی ٹرین چھوٹے ریلوے اسٹیشنوں پر بھی رکے گی۔ راولپنڈی کراچی نان اسٹاپ سر سید ایکسپریس چلائیں گے۔ 14 نئی مال بردار گاڑیاں بھی شروع کرنے جا رہے ہیں۔

شیخ رشید کا کہنا تھا کہ 20 ٹرینیں 6 ماہ میں چلائیں اور 20 مزید چلیں گی، اوور سیز پاکستانی ریلوے میں سرمایہ کاری کرنا چاہتے ہیں تو حوصلہ افزائی کریں گے۔

انہوں نے کہا کہ کوشش ہے وزیر اعظم کے آئندہ دورہ چین میں ایم ایل ون سائن ہوجائے، ملک بھر میں ریلوے ٹریک تبدیلی کے لیے ٹینڈر جاری کیے جا چکے ہیں۔ ٹریک تبدیلی منصوبے میں ایک لاکھ افراد کو روزگار ملے گا۔

انہوں نے کہا کہ ریلوے کی آمدنی بہتر ہے وزیر خزانہ صورتحال دیکھ رہے ہیں، ہم نے ایک مرلہ زمین بیچی اور نہ ہی کرائے پر دی۔ کروڑوں روپے کے تیل کی بچت کی۔ میری خواہش ہے ریلوے اپنا بجٹ خود پیش کرے۔