اظهارات مجدد مقامات افغانستان از ارتباط طالبان با تاجیکستان
در حالی که چندی قبل زمزمه‌هایی درباره تعمیر خودروهای نظامی طالبان در تاجیکستان مطرح شده بود؛ بار دیگر مقامات افغان از درمان زخمیان این گروه در تاجیکستان خبر می‌دهند.
به گزارش دفتر منطقه‌ای خبرگزاری تسنیم، فرماندار شهرستان «دشت ارچی» ولایت قندوز در شمال افغانستان اعلام کرد که والی خودخوانده طالبان برای مداوا به تاجیکستان انتقال یافته است.
وی افزود: این مقام طالبان در پی یک انفجار زخمی شده بود که به کمک روسیه به تاجیکستان انتقال داده شد.
از سوی دیگر، گروه طالبان این اظهارات را رد کرده است.
مقامات سابق دولت افغانستان نیز چندی قبل مدعی شدند که خودروهای زرهی که پس از سقوط ولایت قندوز به دست طالبان افغان افتاده بود، برای ترمیم توسط مهندسان روسی به تاجیکستان منتقل می‌شوند.
«عمرساپی» والی سابق قندوز گفته بود که روند ترمیم خودروهای زرهی و تجهیزات طالبان افغان توسط مهندسان روسی و روابط بین طالبان افغان و مقامات روسی از دو سال به اینطرف ادامه دارد.
اما «محمد جان اولوغ خوجایف» سخنگوی گارد مرزی تاجیکستان، نیز در واکنش به این اظهارات، ادعاهای مقامات افغان را "بی‌اساس" خوانده بود.
«ضمیر کابلوف» نماینده ویژه پوتین در امور افغانستان، نیز در اظهاراتی گفته بود که تاجیکستان متحد روسیه است و هرگونه اهانت به این کشور با واکنش شدید روسیه روبرو خواهد شد.
انتهای پیام/.
