رئیس جمهور تاجیکستان: جامعه جهانی نباید مردم افغانستان را در شرایط سخت تنها بگذارد

به گزارش دفتر منطقه‌ای خبرگزاری تسنیم، «امامعلی رحمان» رئیس جمهور تاجیکستان در گفتگوی تلفنی با «آنتونیو گوترش» دبیرکل سازمان ملل درباره اوضاع کنونی افغانستان تبادل نظر کرد.

وی تاکید کرد جامعه جهانی نباید مردم افغانستان را در شرایط سخت تنها بگذارد.

رحمان همچنین اظهارداشت کمک‌های بشردوستانه جامعه جهانی باید به مردم افغانستان ادامه یابد.

بر اساس اعلامیه دفتر ریاست جمهوری تاجیکستان، این کشور آمادگی دارد تا قابلیت‌های تدارکاتی خود را برای کمک به مردم افغانستان در اختیار جامعه جهانی قرار دهد.

«سراج‌الدین مهر‌الدین» وزیر خارجه تاجیکستان سال گذشته گفته بود، موضع دوشنبه در قبال طالبان و برسمیت شناختن دولت آن‌ها تغییری نکرده است.

وی با اظهار اینکه خواست جامعه جهانی از طالبان ایجاد یک دولت «واقعاً فراگیر» است، ابراز امیدواری کرده بود، طالبان عملاً آمادگی خود را برای مذاکرات با رهبران همه گروه‌های سیاسی و قومی افغانستان به نمایش بگذارد.

این اظهارات در حالی مطرح شده است که دولت تاجیکستان همچنان پناهجویان افغان را اخراج می‌کند.

کمیساریای عالی سازمان ملل در امور پناهجویان در واکنش به اخراج اجباری پناهجویان افغان از تاجیکستان، با انتشار بیانیه‌ای از دولت دوشنبه خواسته بود این روند را متوقف کند.

در این بیانیه آمده است این نهاد طی یک سال گذشته موارد متعددی از بازداشت پناهجویان افغان توسط دولت تاجیکستان، اخراج اجباری آنها و عدم پذیرش افرادی را که نیازمند حمایت بین‌المللی هستند، ثبت کرده است.

انتهای پیام/.