پاکستان میں کورونا وائرس کے حملوں میں تیزی، اموات526 ہوگئیں

تسنیم خبررساں ادارے کی رپورٹ کے مطابق، نیشنل کمانڈ اینڈ آپریشن سینٹر کی جانب سے جاری اَپ ڈیٹ کے مطابق نئے اور مہلک وائرس کو وِڈ نائنٹین کی عالمگیر وبا سے پاکستان بھر میں 22,550 افراد متاثر ہو چکے ہیں، ملک کے مختلف شہروں میں اس وقت کرونا کے زیر علاج مریضوں کی تعداد 15 ہزار 807 ہے۔

 پاکستان میں 24 گھنٹوں کے دوران کرونا کے 1049 نئے کیسز رپورٹ ہوئے، جب کہ اب تک 6217 مریض وائرس سے لاحق ہونے والی بیماری سے صحت یاب ہو چکے ہیں۔

کمانڈ سینٹر کا کہنا ہے کہ گزشتہ چوبیس گھنٹوں کے دوران ملک میں مزید چالیس اموات رپورٹ ہوئیں، سب زیادہ اموات اب تک خیبر پختون خوا میں ہوئی ہیں جن کی تعداد 194 ہے، اس کے بعد پنجاب میں 156 اموات، سندھ میں 148 اموات، بلوچستان میں 21، گلگت بلتستان میں 3 جب کہ اسلام آباد میں 4 اموات ہوئیں۔

پنجاب میں کرونا کیسز کی تعداد سب سے زیادہ 8,420 ہو گئی، سندھ میں 8,189 کرونا کیسز رپورٹ ہو چکے ہیں، خیبر پختون خوا میں کیسز کی تعداد 3,499، بلوچستان میں 1,495، اسلام آباد میں 485 ہو گئی، گلگت بلتستان میں 386 کرونا کیسز رپورٹ ہوئے، آزاد کشمیر میں کیسز کی تعداد 76 ہے۔

گزشتہ 24 گھنٹوں کے دوران ملک میں 10 ہزار 178 کرونا ٹیسٹ کیے گئے، این سی او سی کے مطابق ملک میں اب تک کرونا کے 2 لاکھ 32 ہزار 582 ٹیسٹ کیے جا چکے ہیں۔