پاکستان؛ کورونا وائرس کے 7756 مریض مکمل طور پر صحتیاب

تسنیم خبررساں ادارے کی رپورٹ کے مطابق،  پاکستان میں کورونا وائرس  کےآج بھی نئے کیسز سامنے آئے ہیں جس کے بعد ملک میں مصدقہ کیسز کی مجموعی تعداد 27 ہزار 33 ہوگئی ہے جبکہ اموات 611 تک پہنچ چکی ہیں۔

سرکاری سطح پر سامنے آنے والے اعداد و شمار کے مطابق آج ابھی تک 79 نئے کیسز رپورٹ ہوئے ہیں۔

واضح رہے کہ گزشتہ روز میں ایک روز میں اب تک کے سب سے زیادہ ریکارڈ 2000 کیسز سامنے آئے تھے۔

یہاں یہ بات مدنظر رہے کہ یہ 2 ہزار کیسز وزیراعظم عمران خان کے لاک ڈاؤن کو نرم کرنے کے اعلان کے ایک روز بعد سامنے آئے۔

وزیراعظم نے 7 مئی کو قومی رابطہ کمیٹی کے اجلاس کے بعد یہ اعلان کیا تھا کہ ہفتہ (9 مئی) سے لاک ڈاؤن کو مرحلہ وار نرم کیا جائے گا۔

تاہم ملک میں کورونا وائرس کی مجموعی صورتحال دن بدن تشویشناک ہورہی ہے اور پہلے سیکڑوں یا 3 ہندسوں میں آنے والے کیسز 4 ہندسوں تک پہنچ گئے ہیں جبکہ اموات کی تعداد بھی دوگنی ہوگئی ہے۔

صرف مئی کی بات کریں تو یکم مئی سے 8 مئی تک 226 اموات اور 10 ہزار سے زائد کیسز دیکھے گئے ہیں۔

آج (9 مئی) کو بھی ملک میں کورونا کے نئے مریض سامنے آئے، تاہم صحتیاب ہونے والوں کی تعداد میں بھی اضافہ دیکھا گیا۔

وفاقی دارالحکومت اسلام آباد میں کورونا کا پھیلاؤ بڑھ گیا ہے اور وہاں 51 نئے کیسز رپورٹ کیے گئے۔

سرکاری سطح پر قائم ویب سائٹ کے مطابق ان نئے کیسز کے بعد اسلام آباد میں کورونا متاثرین کی تعداد 558 سے بڑھ کر 609 تک پہنچ گئی۔

اسی طرح گلگت بلتستان میں بھی کورونا کے کیسز میں اضافہ دیکھا گیا۔ اعداد و شمار کے مطابق گزشتہ 24 گھنٹوں میں وہاں مزید 27 کیسز کی تصدیق ہوگئی۔ جس کے بعد گلگت بلتستان میں متاثرین کی مجموعی تعداد 394 سے بڑھ کر 421 ہوگئی۔

علاوہ ازیں اس وائرس سے سب سے کم متاثر علاقے آزاد کشمیر میں بھی صرف ایک کیس رپورٹ ہوا۔

جس کے ساتھ ہی وہاں اب تک کورونا سے متاثرہ افراد کی تعداد 79 ہوگئی۔

ان کیسز کے باوجود ملک میں صحتیاب افراد کی بڑی تعداد دن بدن اپنے گھروں کو لوٹ رہی ہے۔

گزشتہ روز ملک میں ایک ہزار سے زائد مریض شفایاب ہوئے جبکہ گزشتہ 24 گھنٹوں میں مزید ایسے افراد کی تصدیق ہوئی جو مکمل صحتیاب ہوگئے۔

سرکاری اعداد و شمار کے مطابق ملک میں مزید 226 متاثرین صحتیاب ہوئے جس سے یہ تعداد 7756 تک پہنچ گئی۔

اس تمام صورتحال کے بعد اگر ملک کے مجموعی کیسز پر ایک نظر ڈالیں تو 27033 مصدقہ کیسز ہیں جس میں 611 کا انتقال جبکہ 7756 صحتیاب ہوچکے ہیں، اس طرح اس وقت فعال کیسز کی تعداد 18666 ہے۔

اعداد و شمار کے حساب سے پنجاب میں اس مجموعی مصدقہ کیسز 10033 جبکہ سندھ میں 9691 متاثرین ہیں۔

اسی طرح خیبرپختونخوا میں 4327 افراد متاثر ہیں جبکہ بلوچستان میں یہ تعداد 1873 تک پہنچ چکی ہے۔

اسلام آباد میں کورونا وائرس کے 609 کیسز ہیں جبکہ گلگت بلتستان میں اس وبا نے 421 لوگوں کو متاثر کردیا ہے۔ آزاد کشمیر میں اس وقت سب سے کم 79 افراد وائرس سے متاثر ہوئے ہیں۔