کراچی میں تیز ہواؤں کے ساتھ بارش، موسم خوشگوار، بجلی غائب

ذرائع کے مطابق یونیوروسٹی روڈ، ایئرپورٹ،  ملیر، ماڈل کالونی، گلشن اقبال، لانڈھی کورنگی، ناظم آباد اور نارتھ ناظم آباد کے اطراف کے علاقوں میں تیز ہوا کے ساتھ بارش کا سلسلہ شروع ہوگیا ہے۔

حسب روایت بارش سے قبل اور آغاز کے ساتھ ہی شہر کے بیشتر علاقے بجلی سے محروم ہوگئے ہیں۔ ڈائریکٹر محکمہ موسمیات کا کہنا ہے کہ تھنڈر سیلز شہر کے قریب آگئے ہیں ، بارش برسانے والا اسپیل مضبوط ہے۔

اس سے قبل محکمہ موسمیات نے خبردار کیا تھا کہ مون سون سسٹم مضبوط ہوگیا ہے اور بارش برسانے والا سسٹم شہر کے جنوب مشرق میں موجود ہے جبکہ گلشن حدید میں تیز ہوائیں چلنے لگیں ہیں۔

محکمہ موسمیات کے مطابق کراچی شہر میں شام تک سسٹم اثر انداز ہوسکتا ہے جبکہ کراچی میں درجہ حرارت 40 ڈگری سینٹی گریڈ تک پہنچ گیا ہے اور    ہوا میں نمی کا تناسب 45 فیصد ہے۔

محکمہ موسمیات کا کہنا ہے کہ شمال مغرب سے ہوائیں 14کلومیٹر فی گھنٹہ کی رفتار سے چل رہی ہیں۔