کالعدم جماعتوں کے مذموم حربے اور تکفیریت کا لغوپروپیگنڈہ آج زمین بوس ہو گیا، علامہ امین شہیدی

تسنیم خبررساں ادارے کے مطابق، علامہ امین شہیدی کا کہنا تھا کہ مذہبی منافرت کا پرچار کرنے والی یزیدیت پرست قوتیں جو حسینیت کو محدود کرنا چاہتی تھیں آج آکر دیکھ لیں کہ پاکستان کے کونے کونے میں یاحسین ع کی صدائیں بلند ہو رہی ہیں۔

آج ہر گلی ہر محلہ"کل ارض کربلا"کا منظر پیش کر رہا ہے۔آج کا اربعین اس عزم کا اظہار ہے کہ ارض پاک میں ناصبیت کے لیے کوئی گنجائش نہیں۔

حسینیت عشق کے معراج کا وہ جذبہ ہو جو دبانے سے مزید ابھر کر سامنے آتا ہے۔

انہوں نے کہا کہ امام حسین ع کسی مسلک کی میراث نہیں ہیں ہر باشعور بشر اور ہر وہ دل جس میں نبی کریم حضرت محمد صلی اللہ علیہ وآلہ وسلم کی محبت موجود ہے اسے امام عالی مقام اور ذکر امام سے محبت ہے۔

علامہ امین شہیدی نے کہا کہ حسینیت فقط گریہ وزاری کا نام نہیں بلکہ عزاداری کے ساتھ ساتھ امام حسین علیہ السلام کی پیروی کرتے ہوئے ہر دور کے یزید کو للکارنے کا نام حسینیت ہے۔

ہم کربلائی فکر کے پیروکار ہیں۔ ہمیں یزیدی، نمرودی اور شدادی قوتیں کبھی سرنگوں نہیں کر سکتیں، دنیا بھر کے حق پرست آج عالم استکبار و استعمار اور طاغوت کے خلاف برسرپیکار ہیں۔

انہوں نے کہا کہ ان کے عزم و حوصلےہمیشہ کی طرح آج بھی اٹل اور مضبوط ہیں۔حسینیت حق کا ساتھ دینے کا نام ہے جو کوئی باطل کا سامنا کرنے سے کترائے وہ کبھی حسینی نہیں ہو سکتا۔

امین شہیدی نے کہا ملت تشیع نے ہمیشہ اپنے عمل سے یہ ثابت کیا کہ وہ پُرامن قوم ہیں۔جلوس عزا میں لاکھوں عزادار شریک ہوتے ہیں لیکن کبھی کسی بھی مقام پر ایک پتے کو بھی آنچ نہیں پہنچتی۔یہی ہمارے مہذب اور باشعور ہونے کی سب سے بڑی دلیل ہے۔