عالمی شہرت یافتہ باکسر عامر خان کا مظلوم کشمیریوں سے اظہار یکجہتی

خبررساں ادارے تسنیم کے مطابق عالمی شہرت یافتہ لائٹ ویٹ چیمپئن باکسر عامر خان نے لائن آف کنٹرول کا دورہ کیا اور مظلوم کشمیریوں کی حمایت میں آواز بلند کی۔

اپنے دورے میں میڈیا سے گفتگو کرتے ہوئے انہوں نے بتایا کہ مجھے سیکیورٹی وجوہات پر ایل او سی آنے سے منع کیا گیا لیکن میں نے کہا میں ہر صورت جاؤں گا کیونکہ آزاد کشمیر پُرامن ہے اور یہاں زندگی معمول کے مطابق رواں دواں ہے۔

عامر خان نے کہا کہ میں برطانیہ سے کشمیریوں سے اظہار یکجہتی کے لیے آیا ہوں، چاہتا ہوں جس طرح آزاد کشمیر میں امن ہے ایسے ہی مقبوضہ کشمیر میں ہو۔

باکسر نے مقبوضہ کشمیر میں بھارتی اقدام کی مذمت کرتے ہوئے کہا کہ وادی کے لوگ محصور ہیں، انتہا پسند بھارت امن کے لیے خطرہ ہے۔

شہریوں سے گفتگوکرتے ہوئے کہا میرا دل کشمیریوں کے ساتھ دھڑکتا ہے، ایل او سی اور مقبوضہ وادی میں بھارتی جارحیت کے متعلق برطانیہ جا کرسب کو آگاہ کروں گا، امن کا پیغام لے کر ایل او سی پر آیا ہوں،امن سے ہی خطہ ترقی کرسکتا ہے۔ عامر خان نے کشمیر بنے گا پاکستان کے نعرے بھی لگائے۔

ان کا کہنا تھا کہ برطانوی وزیراعظم بورس جانسن نے بھی وادی میں بھارتی اقدامات کی مذمت کی ہے جب کہ برطانوی ارکان پارلیمان نے مقبوضہ کشمیر کی صورتحال پر اہم شخصیات کو خطوط بھی لکھے ہیں۔

عالمی لائٹ ویٹ چیمپئن نے کہا کہ مقبوضہ کشمیر میں معصوم کشمیریوں کی زندگی اجیرن ہوچکی ہے، میرے جذبات کشمیری عوام کے ساتھ ہیں، وہ لوگ تنہا نہیں ان کا ساتھ دیتا رہوں گا اور ان کی آواز بنا رہوں گا۔

اس کے علاوہ باکسر عامر نے مقبوضہ کشمیر میں معصوم کشمیریوں پر جاری وحشیانہ مظالم بند کرنے کا مطالبہ کرتے ہوئے پاکستانی اور عالمی نامور شخصیات سے انسانیت اور امن کے لیے کشمیریوں کا ساتھ دینے کا کہا۔

عالمی باکسنگ چیمپئن عامر خان نے مقامی لوگوں کی مہمان نوازی اور محبت کو سراہا اور پاک فوج اور ڈی جی آئی ایس پی آر کا خاص طور پر شکریہ ادا کیا۔