پنجاب میں 9 مئی سے لاک ڈاؤن میں نرمی کا اعلان

تسنیم خبررساں ادارے کی رپورٹ کے مطابق،  پنجاب حکومت نے 9 مئی سے لاک ڈاؤن میں نرمی کا فیصلہ کیا ہے تاہم اس سے متعلق 8 مئی کو باقاعدہ اعلان کیا جائے گا۔

وزیراعلیٰ عثمان بزدار کی سربراہی میں پنجاب حکومت کا اعلیٰ سطحی اجلاس ہوا جس میں 9 مئی سے لاک ڈاؤن میں نرمی کا فیصلہ کیا گیا ہے۔ حکومتی ذرائع کا کہنا ہے کہ پائپ، اسٹیلز، اسپیئر پارٹس اور مشینری، بجلی کے سامان کی دکانیں کھولنے کا فیصلہ کیا گیا ہے، اس کے علاوہ ٹیکسٹائل انڈسٹری، کنسٹریکشن انڈسٹری اور گلاس مینوفیکچرز کی دکانیں بھی کھولی جائیں گی۔

حکومتی ذرائع کا کہنا ہے کہ پنجاب میں کپڑے کی دکانیں 15 رمضان سے 6 گھنٹے کے لئے کھولنے کا فیصلہ کیا گیا ہے، پارکس کو بھی کھولا جائے گا تاہم لیکن پارکس میں لگے جھولے بند رہیں گے، تمام دکانیں مقررہ وقت پر کھولی جائیں گی جس کے لیے وقت مختص ہوگا۔

اجلاس میں فیصلہ کیا گیا ہے کہ جس چیز کو بھی کھولا جائے گا اس کے لیے پہلے ایس او پیز پر عملدآمد کرنا ضروری ہوگا، ایس او پیز پر عملدآمد کرنا سب کے لئے لازم ہو گا تاہم حکومت پنجاب کی جانب سے 8مئی کو باقاعدہ اعلان کیا جائے گا۔