پنجاب کے مختلف اسکولوں میں ایس او پیز پر عمل درآمد نہ ہونے سے متعدد بچے کرونا وائرس کا شکار

تسنیم خبررساں ادارے کے مطابق، ترجمان محکمہ صحت کے مطابق گوجرانوالہ میں 24 طلبہ اور ننکانہ صاحب میں 7 طلبہ میں کورونا وائرس کی تصدیق ہوئی ہے جب کہ متاثرہ بچوں کے گھر والوں کے بھی ٹیسٹ کیےجا رہے ہیں۔

بھکر، لودھراں میں ایک ایک بچہ جب کہ 2 اسکولزکے 2 ملازمین کورونا وائرس میں مبتلا پائے گئے، ننکانہ صاحب میں ایک سرکاری اور ایک نجی اسکول سیل کردیا گیا۔

محکمہ صحت کے مطابق کورونا ٹیسٹنگ کے لیے 14746 سرکاری، 1566 پرائیویٹ اسکولوں کے طلبہ کےنمونے لیے جاچکےہیں، 2 سے زائد بچوں میں کورونا وائرس کی تصدیق ہونے پر اسکول 5 دن سیل کردیا جائے گا۔

صوبائی وزیر تعلیم مراد راس کا کہنا ہے کہ کورونا ایس او پیز پر عمل درآمد کیلئے تمام ضروری انتظامات کیے جارہے ہیں، 50 فیصد بچے ایک دن اور  50 فیصد اگلے روز اسکول آیا کریں گے۔

وزیر تعلیم نے مزید کہا کہ پنجاب بھر میں کسی بھی اسکول سے کورونا وائرس کے پھیلاؤ کی شکایات ہوں گی انہیں فوری طور پر سیل کردیا جائے گا۔